Calagara Penandatanganan Perjanjian Kinerja jeung Pakta Integirtas dilaksanakan dina poé Kemis, 23 Januari 2025 di Rohangan Utama Balai Kota Sukabumi.
Calagara ieu diluuhan ku Penjabat Wali Kota Sukabumi, Kusmana Hartadji; Penjabat Sekrétaris Daérah, M. Hasan Asari; para Asistén Daérah; Staf Ahli; kepala SKPD, jeung para camat.
Ku ayana calagara samodél kieu beuki nandeskeun yén sakabéh perangkat daérah di Kota Sukabumi bener-bener ngajalankeun pancén dibarengan ku transparansi, akuntabilitas, jeung integrtias.
Pakta Integritas anu ditantanganan téh miboga tujuh poin utama, di antarana; nyegah korupsi, kolusi, jeung népotisme; sikep transparan jeung jujur; sarta komitmen dina ngalaporkeun nalika aya aturan anu dilanggar.
Ngawangun Akuntabilitas jeung Komitmen
Kepala Bagian Organisasi, Yadi Muhammad Erlangga dina laporanna nétélakeun yén perjanjian kinerja jeung pakta integritas anu ditangtangan mangrupa instrumén penting dina Sitem Akuntabilitas Kinerja Instansi Pemerintah (SAKIP).
“Ieu mangrupa dokumén anu janten buktos komitmen dina ngajalankeun amanah ku niléy étika sareng kumaha tuhuna urang kana aturan,” pokna.
Aya 3 Asistén Daerah, 3 Staf Ahli, 31 pupuhu perangkat daérah, jeung 7 camat anu nanda tangan perjanjian kinerja jeung pakta integritas.
Yadi nandeskeun, dokumén bakal jadi ugeran tiap institusi dina ngalakonan pancén jeung sasaran anu geus ditangtukeun.
Pangbagéa Penjabat Wali Kota Sukabumi
Dina éta calaghara, Kuamana Hartadji ngajelaskeun yén perjanjian kinerja mangrupa kawajiban anu diamanahkeun dina Perpres Nomer 29 Taun 2014.
“Alhamdulillah, kanggo taun 2025 ieu, urang sadayana tos tiasa nandatangan dina waktosna, malah sateuacan wates anu tong ditangtoskeun,” pok Penjabat Wali Kota Sukabumi.
Kusmana ngingetan para pupuhu perangkat daérah sangkan paham jeung muserkeun diri kana sababaraha indikator anu kaunggel dina perjanjian kinerja, utamana ngarojong kana visi Kota Sukabumi 'Bahagia Lahir jeung Batin'.
Kang Tutus, landihan Kusmana Hartadji, nandeskeun ka para pupuhu perangkat daérah, kudu miboga rarancang sangkan perjanjian kinerna bisa nepi ka para staf. Hal ieu kudu dilakonan sangkan sagala rupa anu dipikahayang bisa kahontal.
Pj. Wali Kota Sukabumi nétélakeun ogé, réngsé Wali Kota jeung Wakil Wali Kota Sukabumi définitif diistrénan, baris dilakonan deui nandatangan perjanjian kinerja jeung pakta integritas dina bulan Fébruari jeung Maret 2025.
Saterusna, hal anu sarua bakal dilaksanakan deui dina bulan Oktober 2025 saheuleut jeung révisi anggaran sarta Rencana Pembangunan Jangka Menengah Daerah.
“Abdi miharep, PK sareng Pakta Integritas ieu sanés mung saukur janji anu diserat, ogé kedah janten papagon dina ngawujudkeun pamaréntahan anu langkung saé. Hayu urang buktoskeun prinsip Whole of Government ku ningalikeun sikep rempug jukung sauyunan sareng sakumna unsur masyarakat,” tandesna.
Ku ayana ieu calagara, Pamaréntah Kota Sukabumi boga harepan gedé dina ngaronjatkeun kualitas layanan publik. Leuwih ti éta, sangkan bisa ngawujudkeun tata kelola pamaréntahan anu leuwih transparan jeung akuntabel demi sakumna masyarakat.**Kang Warsa
Dokumentasi : Agus Rustiawandi
DOKPIM KOTA SUKABUMI
Pranata Kehumasan
Ross Pristianasari
